ئەپڵ لە ئیڤێنتێكدا چوار جۆر ئایفۆنی نوێ نمایشدەكات

Google+ Pinterest LinkedIn Tumblr +

كۆمپانیای ئەپڵ نوێترین سمارتفۆنەكانی خۆی نمایشكرد كە بریتین لە چوار ئایفۆنی 12 و تەواوی تایبەتمەندیی و نرخەكانیشی ئاشكراكرد.

ئیڤێنتەكەی ئەپڵ ئەمڕۆ سێشەممە كاتژمێر 8ی شەو بە كاتی هەرێمی كوردستان ئەنجامدرا و تێیدا هەریەك لە سمارتفۆنەكانی ئایفۆن 12 مینی، ئایفۆن 12، ئایفۆن 12 پڕۆ و پڕۆ ماکس نمایشكران.

سەرجەم سمارتفۆنە نوێیەكانی ئەپڵ تەكنەلۆجیای پێشكەوتوی بیۆنیك بەكاردەهێنن و هاوێنەی كامێراكانیان چاكسازی زیاتری تێداكراوە، بە شێوەیەك كوالیتی وێنەگرتن و زوومكردنیان لە ئاستێكی بەرزتردایە بەراورد بە سمارتفۆنەكانی پێش خۆیان، قەبارەكانیشیان گەورەترە لە مۆبایلە زیرەكەكانی پێش خۆیان.

ئایفۆن 12 بە رەنگەكانی رەش، سپی، سور، سەوز و شین بەردەست دەبێت و لە لاتەنیشتەكانییەوە ماددەی ئەلەمنیۆم بەكارهێنراوە، سێ جۆر یادگە “میمۆری” 64، 128 و 256 گێگابایتی لەگەڵدایە، قەبارەی شاشەكەی 15.5 سانتیمەترە و گەر بكەوێتە ناو ئاو هەتا شەش مەتر قوڵی، بۆ ماوەی 30 خولەك بەرگری لە چونەناوەوەی ئاوەكە دەكات.

لەرێگەی شاحینەی بێتەلەوە بارگاویدەكرێت و خاوەنی دو هاوێنەی كامێرایە، باترییەكەی لەنێوان 10 بۆ 65 كاتژمێر كاردەكات بەگوێرەی چۆنییەتی بەكارهێنانی، نرخەكەی لە 699 دۆلارەوە دەستپێدەكات.

ئایفۆن مینی هەمان تایبەتمەندییەكانی ئایفۆن 12 ی هەیە  و دو هاوێنەی كامێرای بە كوالیتی 12 مێگاپیكسڵ هەیە، توانای چركاندنی وێنەی كوالیتی بەرزی هەیە تەنانەت لەكاتی جوڵەی كەم و لەرزینی بچوك لە ئامێرەكەدا، نرخەكەی هاوشێوە لە 699 دۆلارەوە دەستپێدەكات.

بە هەمانشێوە، ئایفۆن 12 پرۆ تایبەتمەندییەكانی ئایفۆن 12 و مینی هەیە، ئەوەی جیایان دەكاتەوە بریتییە لە ژمارەی كامێراكانی، كە خاوەنی سێ كامێرایە بە كوالیتی 12 مێگاپیكسڵ و كوالیتی وێنەكانی دەگاتە 4k، هاوكات تایبەتمەندیی ناسینەوەی  روخساری هەیە و باترییەكەی لەنێوان 11 بۆ 80 كاتژمێر كاردەكات بەگوێرەی چۆنییەتی بەكارهێنانی، نرخی ئایفۆن 12 پرۆ لە 999 دۆلارەوە دەستپێدەكات.

قەبارەی شاشەی ئایفۆن 12 پرۆ ماكس 17 سانتیمەترە و هەمان تایبەتمەندییەكانی ئایفۆن 12 پرۆی هەیە، تەكنەلۆجیاكانی 3G ، 4G و 5G تێدا بەكاردەهێندرێت و نرخەكەی لە 999 دۆلارەوە دەستپێدەكات.

| 1210 جار خوێندراوەتەوە|

Comments are closed.

Open