هەواڵی مردنی کچە کوردێک

27/06/12
  • بنێره‌ بۆ فه‌یس بوک

  •    ئه‌م بابه‌ته‌ 11,129 جار خوێنراوه‌ته‌وه‌


    هەواڵی مردنی کچە کوردێک و دواییش کۆڕی ماتەمینی و ماڵاوایی لێکردنەکەی چۆن لە قوتابخانەکەی لە نۆروێژ(نەرویج)دا بەڕێوەچوو؟ ـ نووسینی فەرامەرز ئەڵماسی

    بۆچی من ئەم هەواڵە یان رێپۆرتاژە دەنووسم؟

    من کە ئەم هەواڵە دەنووسم، چەن ساڵێکە لە قوتابخانەی هاسلە لە وڵاتی نۆوریژ(نەرویج) ئیش دەکەم. بەداخەوە رۆژنامەوان نیم و لەوبوارەدا زۆریش شارەزانیم تا باشتری بنووسم. بەپێی توانا هەوڵدەدەم هەواڵەکە وەک ڕێپۆرتاژێک بێ، ئەگەر بکرێ ئەو ناوەی لێ بنرێ، بۆ ئەوەی تێگەیشتن و کەڵک لێوەرگرتنی ئاسانتر بێت. ئامانج لەم کارە ئەوەیە کە هەم بۆ تاک و بنەماڵەی کورد لە هەر کوێ کە دەژین، و، هەم بەرپرسانی دامودەزگای خوێندن لە پارچەکانی تری کوردستان بزانن، کە قوتابخانەیەکی ئورووپایی(ئەورووپی) چۆن و بە چ شێوەیەک بەرەوڕووی رووداوی تاڵی لەدەستدانی قوتابییەک دەبێتەوە. لەوانەیە لەم بارەوە جیاوازی زۆر هەبێ لە نێوان پارچەکانی کوردستان، یان تەنانەت ناوچەکانی هەر پارچەیەکدا. چونکە زۆر فاکتۆر لەسەر شێوەی هەڵسووکەوتی ئێمە بە تایبەت، لە بوارێکی وەهادا کاریگەرییان هەیە. من شێوەی مامەڵەکردنی ئەم قوتابخانەیە لەگەڵ ئەم رووداوە، بە شێوەیەکی زۆر جوان دەزانم. لێرەدا بوار بە مناڵ دەدرێ کە لە کاتی بەرەڕووبوونەوەی خەم وتازیەباریدا لەگەڵ گەورەساڵان بەشداربێ و، لە کاتی گریانیشدا دەستی دایک و باوکی بەسەرەوە بێ. بۆیە لێرەدا لەسەری دەنووسم و ڕوونیدەکەمەوە بەشکوو ئێمەی کوردیش کەڵکی لێوەرگرین.

    ئەوەی من لە کاتی مناڵی خۆمدا لەبیرم بێ، گەورەساڵان بە ژن و پیاوەوە، هەواڵی رووداوە تاڵەکانیان بەشێوەیەک لە مناڵان دەشاردەوە و، ئەوانیان تێکەڵی پرسەی خەمباری و فرمێسک هەڵوەراندن نەدەکرد. لەوانەیە ئامانج لەو کارە ئەوە بێ کە ئەو خەمە بەسەر مناڵاندا دابەش نەکەن، تاوەکوو ئەوان لە دونیای مناڵی خۆیاندا تێکەڵی خەمەکە نەبن و، ئازار نەچێژن. بەڵام لەوانەشە رێگەی بەشداری پێکردنی مناڵانیان لە حاڵەتی تازیەباریدا لا ئاستەم و دژوار بووبێ و، نەیانزانیبێ چۆن و بە چ زمانێک مناڵ لە ڕووداوەکە تێبگەیەنن. بۆ ئەوەی هەم مناڵەکە بە یارمەتی دایک و باوک خەمی دڵی هەڵڕێژێ و هەمیش زۆر دڵبریندار نەبێ. من لێزانی ئەم بوارە نیم و شیکردنەوەی زیاتر دەهێڵینەوە بۆ پسپۆڕانی ئەم بوارە. لەوانەیە بەرێز دوکتۆر کەریم قەرەچەتانی لە تەلەفزیۆنی گەلی کوردستان، بتوانێ لەم بارەوە پرۆگرامێک پێشکەش بکا و زیاتر روونکردنەوە بدا بۆ بەرچاوڕوونی دایک و باوکانی کورد.

    بەڵام منیش سەرەڕای تەواوکردنی دەورەی مامۆستایی سەرەتایی لە ئێران و تەواوکردنی کۆلیژی مامۆستایی لەم وڵاتە، زیاتر لە 22 ساڵە، لە بواری جۆراوجۆردا لەگەڵ مناڵانی پۆلەکانی سەرەتایی و ناوەندی کار دەکەم، کە زیاتر لە 16 ساڵی لەم وڵاتەدا بووە. هەربۆیە بەپێی ئەو پێشینەیە، مافم بە خۆم دا کە ئەم هەواڵ یان ڕیپۆرتاژە بنووسم و چەن وێنەیەکیشی لەگەڵدا دانێم. هەڵبەت من ئەم کارە بە ڕەزامەندی دایک و باوکی قوتابییەکە و بەڕێوەبەری قوتابخانە دەکەم. جیا لەمە هەر بە ڕەزامەندی ئەوان من، وتاری ماڵاوایی لە قوتابییەکە کە لە لایەن بەڕێوەبەری قوتابخانەکەوە پێشکەش کرا، وەردەگێڕمە سەر زمانی کوردی بە دوو شێوە نووسینی لاتینی و ئارامی(عەرەبی) بۆ دانانی لەسەر ماڵپەڕی قوتابخانەکە. ئەو وتارەش هەر لەگەڵ ئەم ڕیپۆرتاژە دەنێرم بۆ ماڵپەڕ و رۆژنامە کوردییەکان.

    هەواڵی کۆچی دوایی قوتابییەکە و مامەڵەکردنی قوتابخانە لەگەڵ هەواڵەکەدا

    ئاژە(ئایە) ئازاد سەعدوڵا کچە کوردیکی تەمەن 9 ساڵ، لەدایکبووی نەرویج، لە پۆلی 3ی سەرەتایی لە قوتابخانەی هاسلە(Hasle ( لە ئوسلۆ پێتەختی وڵاتی نۆوریژ(نەرویج) ئێوارەی سێشەممە 05.06.2012 بە هۆی نەخۆشییەکی نادیار ماڵاوایی لێکردین. بنەماڵەی ئایە لە ئەسڵدا خەڵکی دهۆکن و ئەو دوو خوشکی لە خۆی بچووکتر و یەکێک لە خۆی گەورەتری هەبوو. هەواڵی مردنەکەی چوارشەممە کاژێر 09.30 لە ڕێگەی بەڕێوەبەری قوتابخانەکەوە گەیشتە مامۆستا و کارگێڕانی قوتابخانەکە. ئەم قوتابخانەیە لە ساڵی1957ەوە دامەزراوە و ئێستە 480 قوتابی و 70 مامۆستا و کارگێڕی هەیە. بەڕێوەبەری قوتابخانەکە دوای بیستنی هەواڵەکە ئەو مامۆستایانەی کە بۆ تێپەڕکردنی کۆرسێکی یەک رۆژە چووبوونە دەرەوەی قوتابخانەکە، بانگهێشت کردەوە. دوای ئەوە کۆبوونەوەیەکی گشتی بۆ مامۆستا و کارگێڕەکان گرت و هەواڵەکەی پێڕاگەیاندن. بە پێی ئەو پلانە لەپێشدا ئامادەکراوانەی کە هەر قوتابخانەیەک بۆ ڕووبەڕوو بوونەوەی حاڵەتی لەم جۆرە هەیەتی، کارەکانی بە چەن قۆناغدا دابەشکرد. دوای ڕاگەیاندنی هەواڵە، رێنوێنی پێویستی بە بەشداران دا بۆ ئەوەی چۆن بە هێوری و شێنەیی هەواڵەکە بە قوتابییەکانیان ڕابگەیەنن. گوێ بۆ هەڵوێست و کاردانەوەی هەواڵە ڕاگرن و بە دڵفراوانییەوە قسە لەگەڵ قوتابییەکاندا بکەن، بە تایبەت قوتابییانی پۆلەکەی ئایە کە زیاتر لە مانگێکە ئەویان دوای نەخۆش کەوتنی نەبینیوە و تاسەیان کردووە. دوای ئەوە نامەی ئاگادارکردنەوە بۆ دایک و باوکان بدەن بە هەموو قوتابییانی قوتابخانەکە.

    لە نامەکەدا زانیاری لەسەر بەڕێوەچوونی کۆڕی ماتەمینی و ماڵاوایی لە ئایە لە لایەن قوتابخانەوە لە هۆڵی گشتی قوتابخانەکە بۆ بەیانی واتە پێنجشەممە کاژێر 10.30 نووسرابوو. لەو کاتەدا کە مامۆستاکان ئەم ئەرکەیان جێبەجێ دەکرد، ئاڵای نۆرویژ لە حەوشەی قوتابخانەکە بە نیشانەی خەمباری و ئازیەتباری نیوە شەکاوە بوو تا نیوە هەڵدرا. قوتابییەکان پۆل‌پۆل لە ژوورەکانی خوێندن هاتنە دەرەوە و بەشێکیان بە چاوی بەگریانەوە لەدەوری ئاڵاکە کۆبوونەوە. بەخێرایی ڕێگەی دەربڕینی خەمی خۆیان بینییەوە. بەشێک رۆیشتن و وێنەی قوتابییانی پۆلەکەیان هێنا کە لەوێدا ئایە لە ناوەڕاستیاندا راوەستابوو. وێنەکەیان بەڕێزەوە لەبن ئاڵاکە دانا. دەستیان کرد بە نووسینی هەستەکانیان لەسەر ئایە بە شێوەی جۆراوجۆر، بە نووسینی ئایە بەئارامی بنوو، تۆ لەبەهەشت دای، ئێمە تۆمان لەبیر ناچێتەوە، بۆ وازوو بەجێتهێشتین، تۆ بەردەوام لە دڵی ئێمە دای، لەگەڵ هەموو ڕێزوسڵاومان بۆ تۆ، … بە نووسینی ناوی خۆیان، بە کێشانەوەی وێنەی خۆری چاوبەگریان، بە کێشانەوەی دڵێک کە لە ناوەڕاستی نووسرابوو”ئایە”، بە کێشانەوەی ئاڵای نیوەشەکاوە تانیوەهەڵدراو، بە چینینەوەی گوڵی حەوشەی قوتابخانەکە و دانانی لەسەر وێنە و نووسراوەکان … دیمەنێکی سەیر بوو کە چۆن و بە چ شێوەیەک مناڵانی بەتایبەت 7 ـ 6 ساڵ بەو شێوەیە هاوخەمی خۆیان دەردەبڕی. ئەمە سەرەڕای ئەو وێنە و کارت و نووسراوانە بوو کە دوایی لە پۆلەکەیاندا و هەر پۆلەی بەجیا ئامادەیان کرد، و لە کاتی ماتەمینە گشتییەکەدا مامۆستای پۆلەکە لەبەردەم وێنەکەی ئایەدا دایدەنان. ئەوان ئاگادارکرابوونەوە کە بەیانی کۆڕی ماتەمینی و ماڵاوایی لە قوتابخانە بەڕێوەدەچێ، بەڵام مناڵان نەیاندەتوانی چاوەڕێ بن و کۆڕی ماتەمینی خۆیان بەم شێوەیە دەستپێکرد و تا ئێوارەی رۆژی دوایی درێژەی هەبوو. تا ئەو کاتەی کە خوشکە گەورەکەی ئایە هات و هەموو وێنە و کارت و نووسراوەکانیان پێدا بۆ ئەوەی بیباتەوە بۆ ماڵ.

    شێوەی گرتنی کۆڕی ماتەمینی و ماڵاوایی لە هۆڵی گشتی قوتابخانەدا:

    رۆژی دواتر، واتە پێنجشەممە، کاژێر 10.00 حەوشەی قوتابخانە پڕبوو لە قوتابی و ژمارەیەکی زۆر دایک و باوک کە بۆ بەشداری کۆڕی ماتەمینەکە هاتبوون. دایکی ئایە و چەن پوورو خزمێکی لە نێو ئاپۆرای خەڵکەکەدا راوەستابوون و دایک و باوکی قوتابییەکان بەڕیز وەستابوون بۆ ئەوەی لەنۆرەی خۆیاندا سەرەخۆشی لەوان بکەن و هاوخەمییان لەگەڵ دەربڕن. من لە لای ئاڵاکە وەستابووم و سەیری نووسراوەی قوتابییەکانم دەکرد کە زۆر سەرنج ڕاکێش بوون. بەڕێوەبەری گشتی قوتابخانەکە کە دەیزانی من کوردم و بنەماڵەی ئایەش کوردن، بەرەو لای من هات و هەواڵی دایک و باوکی ئایەی پرسی کە لەکوێی حەوشەکە ڕاوستاون. چونکە دەیویست پێشەکی چاوی پێیان بکەوێ و هاوخەمییان لەگەڵ دەربڕێ. پێکەوە رۆیشتین و لە نۆرەی خۆماندا هاوخەمیمان لەگەڵ دەربڕین. بەڵام من، وەک زۆر جار کە لە کاتی مەرگی مناڵاندا دڵم بە تەواوی پڕدەبێ، لە هەڵڕشتنی فرمێسک زیاتر هیچ وشەیەکم بۆ نەوترا. بە ئیشارەی سەر و دەست هاوخەمیم لەگەڵ دەربڕین بۆ هەڵڕشتنی فرمێسکی زیاتر لێیان دوورکەوتمەوە.

    ژمارەیەکی زۆر بە بێدەنگی فرمێسکەکانیان دەسڕیەوە. بەشێک لە دایک و باوکانم دەناسی کە مناڵەکانیان، کەسی نزیکیان لەدەستدابوو و لەوێ ئامادەبوون. وەک ئەوەی بۆ دەربڕینی خەمی خۆیان هاتبن، هەروەهاش بوو کە دوایی لە هۆڵی گشتیدا بینیم. نەک وەک لای خۆمان کە ئەم کارە تەنیا بۆ گەورەساڵان باوە و مناڵان لێی بێبەشن. ئەوانەی دەڕۆنە کۆڕی تازیە و ماتەمینی خەڵک، مەرگی ئازیازانی خۆیان دێیینەوە پێش چاو. لە بڕێک ناوچەی کوردستاندا ئەگەر ئافرەت بن و توانایی سەرمۆرهێنانەوەیان هەبێ، بە دەنگی بەرز دەگرین و بە کەسی تازەکۆچکردووی خۆشیاندا هەڵدەڵێن. ئەمە بۆ دەربڕینی خەم و ئێش و ئازارە و ئەوان گوێ نادەنە ئەوەی فڵان مەلا یان مامۆستا چی دەڵێ. من نامەوێ بڵێم لایەنی چاکە و خراپەی گریان بە دەنگی بەرز چییە، بەڵام لەوانەیە زۆر جار شێوەی دەربڕینی خەم و ئازار لە دەسەڵاتی مرۆڤەکەدا نەبێ و بە دەنگی بەرز بگری و هاوار بکا. هەڵبەت لەم کۆڕەدا گریان و فرمێسکی بێدەنگ هەڵڕشتن زۆربوو، بەڵام تەنیا گریانی ئەو مناڵانەی دایک یان باوکیان پێش ماوەیەکی کەم لەدەستدابوو بە دەنگی بەرزبوو.

    هۆڵی گشتی بە وێنەیەکی ئایە و مۆمێک و چەن چەپکەگوڵ و چەن کارتێکی نووسراو ڕازابۆوە. بەڕێوەبەر و چەن کارگێڕێک لەوێ ڕاوەستابوون و چاوەڕوانی قوتابییەکانیان دەکرد. خانمێک بە ڤیۆلۆنیکەوە لە لای پیانۆیک ڕاوەستابوو و نۆتە و سروودەکانیشی ئامادەکردبوو. قوتابییان بە پێی بەرنامەی بۆداڕێژراو کاژێر 10.25 پۆلپۆل هاتنە ناو هۆڵەکە و دانیشتن. ئەو هەموو خەڵکە بە مناڵ و گەورەوە بە تەواوی و بەشێوەیەکی زۆر بێدەنگ بوون. هۆڵەکە لە 10.30 پڕبوو و بەڕێوەبەری قوتابخانە بەخێرهاتنی بەشدارانی کرد و وتارەکەی دەستپێکرد. وتارەکە وەرگێڕدراوەتە سەر زمانی کوردی و لە ماڵپەڕی قوتابخانەکەدا(http://www.hasle.gs.oslo.no/) دادەنرێ و بەجیا لەگەڵ ئەم نووسراوەیەشدا دەنێردرێ.

    دوای بەخێرهاتنکردن و ڕاگەیاندنی دوبارەی هەواڵەکە، بەڕێوەبەر مۆمێکی داگیرساند و خولەکێک بێدەنگی ڕاگەیاند. بە دوای ئەودا وتارەکەی پێشکەش کرد. وتارێکی زۆر جوان و پڕ لە هەست بوو. بەیناوبەین دەنگی پیانۆ یان ڤیۆڵۆن بە ئاهەنگی خەماوی هۆڵەکەی پڕدەکرد. چەن سروودێکیش بوونە ناواخنی بەرنامەکە کە تێکستەکەیان لەسەر پەردەیەکی سپی لە لایەن هەموو بەشدارانەوە دەبینرا و دەخوێنرایەوە. دەنگی سروودخوێندنی بەشداران و ئاهەنگە خەمناکەکان یارمەتیدەری دەربڕینی خەمەکان و هەڵوەراندنی فرمێسکەکان بوون. کچە نۆرویژییەکی هاوڕێ و هاوپۆلی ئایە و هەروەها خۆشکەکەی ئایە لە پۆلی 6ی هەمان قوتابخانە توانییان بەسەر فرمێسک و قوڕگی گیراویاندا زاڵبن و هەرکامەیان وتەیەکی کورت پێشکەش بکەن. بەڕێوەبەری گشتی دوای 30 خولەک کۆتایی کۆڕەکەی ڕاگەیاند و قوتابییەکان پۆلپۆل لە ڕیزی دواوە بەبێدەنگی هەستان و لەگەڵ مامۆستاکانیان هۆڵەکەیان بەرەو پۆلەکانیان بەجێهێشت. ڕیزی بەردەم وێنەکە دوای گشت هەستان و هەموو مامۆستاکان لەگەڵ بەڕیکردنی قوتابییەکانیان دەهاتن و جارێکیتر هاوخەمییان لەگەڵ دایکی ئایە و پوورەکانی دەردەبڕی. تەنیا ئەوان لەسەر 5 ـ 4 کورسی دانیشتبوون و باقی بەشداران، بە گەورە و مناڵەوە، لەسەر عەرز دانیشتبوون و ژمارەیەکی کەمیش بە پێوە ڕاوەستابوون. هاتنە ژوورەوەی زیاتر لە 600 کەس بۆ ناو هۆڵێکی گشتی و بەڕێوەچوونی کۆڕێکی ماتەمینی، و چوونەدەرەوەیان زۆر بەبێدەنگی تەواو بوو. بەڵام ئەو قوتابییانەی کە کەسی نزیکیان لەدەست دابوو و لە نزیک وێنەکەی ئایە دانیشتبوون، ئەو بێدەنگییەیان تا ڕادەیەک شکاند و دەنگی گریانیان بەرز بۆوە. دایک یان باوکیش بە دەستێک دەستی بەسەردا دەهێنان و بە دەستێک فرمێسکیان دەسڕێەوە. دەنگی گریانی قوتابییەکان کاتێک بەرزتر ئەبوونەوە کە دایکی ئایە ئەوانی لەباوەش دەگرت و ماچی دەکردن. دیمەنێکی سەیربوو. ئەم دیمەنە ئەگەر چی لە کۆمەڵی بچووکی قوتابخانەیەکدا دەبینرا، دەریدەخست کە مرۆڤەکان لە هەر ڕەنگ و جنس و رەگەزێک بن و خاوەنی هەر ئایینێک بن، سۆزی زۆریان بۆ یەکتر هەیە و ئەو جیاوازییە ڕواڵەتییانە بەر بەو سۆزە ئیسانییە ناگرن.

    لە کاتی هاتنە ژوورەوەدا مامۆستای هەر پۆلێک هەموو ئەو کارت و نووسراوە و وێنانەی کۆکردبۆوە کە قوتابییانی پۆلەکەی ئامادەیان کردبوو و لە بەردەم وێنەکەی ئایەدا بەڕیز دایدەنان. لە کۆتاییدا جێگری بەڕێوەبەر لەسەریەک داینان و تەحویلی دایکی ئایەی دان. بەڵام مامۆستایەکیتر لێی وەرگرتەوە بۆ ئەوەی بەشێوەیەکی جوان بیانخاتە ئالبوومەوە بۆ ئەوەی باشتر بپارێزرێن. دوو ئالبوومی جوانی لێ دروستکردن و لەگەڵ دەستە گوڵەکان ئامادەی کردن بۆ ئەوەی ئێمە لەگەڵ بەڕێوەبەری گشتی کاتی سەردان بیدەین بە بنەماڵەی ئایە.

    سەردانی ماڵی دایک و باوکی ئایە

    بەڕیوەبەری گشتی قوتابخانەکە لەگەڵ دایکی دوو لە قوتابییەکان کە نوێنەری دایک و باوکانی پۆلەکەی ئایە بوون، لەگەڵ دایکی ئایە قەراریان دانابوو کە کاژێر 16.00 سەردانی ماڵیان بکەن. منیش ئاگاداربووم و لەگەڵیان ڕۆیشتم. دوو ئالبوومی ئامادەکراو و چەن دەستە گوڵمان بۆ بردن. چەن کەسێکی خزم و نزیک لە باخچەی ماڵ دانیشتبوون و چەن کەسێکیتر لە ماڵەوە دانیشتبوون. ئێمە چووینە ژوورەوە و گوڵ و ئاڵبوومەکانمان تەحویل دان و جارێکیتر سەرخۆشیمان لێکردن. سەیری وێنەکانی ئایەمان کرد کە لە نەخۆشخانە گیرابوون و جارێکیتر دڵمان پڕبوو لە خەم. بەڕێوەبەر جارێکیتر ڕوونیکردەوە کە من، فەرامەرز، وتارەکەی ئەو وەردەگێڕمە سەر زمانی کوردی و لەگەڵ چەن وێنەیەک لە ماڵپەڕی قوتابخانە دایدەنێن و هەروەها من نووسراوەیەکیش لە سەر کۆری ماتەمینەکە لەگەڵ وێنە بۆ ماڵپەڕ و رۆژنامە کوردییەکان دەنێرم. هەڵبەت ئەمە پێشنیاری من بوو کە لەگەڵ بەڕێوەبەر و دایکی ئایە هەرکام بە جیا باسم کردبوو و ئەوان پەسندیان کردبوو. بەڵام پێویست بوو بەڕێوەبەر ڕەزامەندی دایک و باوکی ئایە و نوێنەری دایک و باوکانی پۆلەکەی ئایە پێکەوە بۆ ئەم کارە وەرگرێ. بەڕێوەبەر، ئوولاڤ کنویتسن، بە دایک و باوکی ئایەی ڕاگەیاند کە وێنەکەی ئایە تا کۆتایی ساڵی خوێندن واتە تا 22.06.2012 لە پۆلەکەیدا لەسەر مێزەکەی دادەنرێ. دوای ئەوە ئێمە گەڕاینەوە بۆ قوتابخانە و کۆڕی ماتەمینی ئەوان بەردەوام بوو. هەڵبەت ئامادەکارییان کردبوو کە یەکشەممە یان دووشەممە جەنازەی ئایە ببەنەوە بۆ دهۆک، و بە پێی پەیوەندی تەلەفۆنی لەگەڵ باوکی ئایە، من بۆم دەرکەوت کە ئەوان شەممە گەیشتبوونە هەولێر.

    ئەو کۆڕی ماتەمینەی بەو شێوە جوانە بەڕێوەچوو، بەشێکی ئاکامی کار و پلاندانانی باشی بەتایبەت بەڕێوەبەری گشتی قوتابخانەکە و کارگێڕانیەتی. بەشێکیتری دەگەڕێتەوە بۆ ئەو پلانانەی پێشتر داڕێژراون و ئامادەکراون بۆ حاڵەتی لەو جۆرە. هەربۆیە پێویست ناکا هەر بەڕێوەبەرێک لە سیفرەوە دەست پێ بکا و هەموو شتەکان لە سەرەتاوە دابنێ. من نازانم لە وڵاتی ئێمە بەگشتی و لە هەرێمی کوردستان بەتایبەتی لەم بوارەدا چی کراوە و قوتابخانەکان چ پلانگەلێکیان بۆ ئەم حاڵەتانە لەبەر دەستدایە. ئەگەر بەڕێوەبەرانی قوتابخانەکان یان وەزارەتە پەیوەندیدارەکان بەڕاستی پێویستیان بە پلانگەلێ لەم بابەتە هەیە، من دەتوانم وەریانگێڕمە سەر زمانی کوردی و بۆیان بنێرم. ئەوەش ئیمەیلی من:

    faramarz.almassy@ude.oslo.kommune.no

    فەرامەرز ئەڵماسی ـ ئوسلۆ 10.06.2012

  • بنێره‌ بۆ فه‌یس بوک

  •    ئه‌م بابه‌ته‌ 11,129 جار خوێنراوه‌ته‌وه‌

    سه‌رنج نوسین داخراوه‌.

    ئاگاداری گرنگ :تکایه‌ سه‌رنجێک مه‌نوسه‌ که‌له‌گه‌ڵ ڕه‌وشتی گه‌له‌که‌مان ناگونجێت ئه‌م سه‌رنجانه‌ پاش پیاچوونه‌وه ‌ بڵاوده‌کرێنه‌وه‌. بۆیه‌ خۆت ماندوو مه‌که‌ له‌نوسینی سه‌رنجی بێمانا. تا ئێمه‌ش ڕێگه‌ی سه‌رنج نوسین دانه‌خه‌ین.

    New Page 1

    لێرە کلیک بکەن بۆ نووسین بە کوردی سۆرانی

    میوانی سەرهێڵ

    0 میوان له‌سه‌ر هێڵه‌
    ................................. سه‌ردانه‌کان ژماره‌ی سه‌ردان

    گه‌ڕان له‌م ماڵپه‌ڕه‌

    کەش و هەوا

    درامای پەتریپوت

    ماڵپەڕی خۆشی

    ناوی منداڵان

    نرخی دراوه‌کان

    گۆرانی عه‌ره‌بی

    Archives

    New Page 1

     

    کلیکی ئێرە بکە زەرەر ناکەیت دواتر لایکی بکە و سەدان بابەتی هەمەرەنگ ببینن

    New Page 1
    New Page 1
    New Page 1
    NRT ناوخۆ پەیامنێر خەندان سبەی هاوڵاتی ئاوێنە
        سڤیل کوردیۆ لڤین PUK-MEDIA SNN