xml feed

چیرۆكی ئەو كچانەی كە گرتەی مۆبــــایـلـیــان بڵاو كراوەتەوە

16/12/10
  • بنێره‌ بۆ فه‌یس بوک

  •    ئه‌م بابه‌ته‌ 26,229 جار خوێنراوه‌ته‌وه‌

    hhfdhfdh
    “كاتێك چووم بۆ لای قوتابیانی هاوپۆلەكەم، بەدیار گرتەی ڤیدیۆی منەوە وەستابوون و بە بلوتوز بۆ یەكتریان رەوانە دەكرد، ئەو دیمەنە ئەوەندە منی تووشی شۆك كرد، خەریكبوو لەهەمان شوێن گیانم دەربچێت، چونكە من تەنها بۆ خۆشی لەناو خێزانەكەم ئەو سەمایەم كرد، نازانم چۆن بەوشێوەیە بڵاوبووەوە و كەوتە دەستی خەڵك”.
    ئەمە قسەی كچێكی تەمەن (19) ساڵەی رەنگ ئەسمەربوو، كە لەسەر داوای خۆی، ناوە راستەقینەكەی نەگوت و خۆی بە (هێما) ناساند. هێما، هەرگیز چاوەڕێی ئەو رۆژەی نەدەكرد، وەك چۆن لەگەڵ هاوپۆڵەكانی سەیری گرتە مۆبایلەكانی خەڵكی دیكەی دەكرد، بۆخۆی ببێتە جێگای باس و گرتەی سەماكردنی ئەو بە نێو هاوپۆڵەكانیدا بڵاو ببێتەوە. ئەو لەكاتی قسەكانیدا رووگرژی و توڕەیی زۆری پێوە دیاربوو، بڵاوبوونەوەی گرتە ڤیدۆییەكەی زۆر كاریگەری لەسەر كردبوو. لەدوای بیركردنەوەیەكی قوڵ، گوتی “من زۆر ئارەزووی سەما دەكەم، هەربۆیەش زۆر جار لەماڵەوە لاسای سەمای هیندی دەكەمەوە، رۆژێك لەناو خێزانەكەماندا دەستم بەسەماكردن كرد و ئەوانیش چەند خولەكێك سەماكەیان بە مۆبایل وێنە گرت. دوای چەند مانگێك بینیم ئەو گرتەیەم لەسەر مۆبایلی زۆربەی قوتابیانی هاوپۆلەكەمە”، ئەو كچە كە چەند جارێك، دووبارەی دەكردەوە بەوەی ناوە راستەقینەكەی نەنوسرێت، تاوەكو كێشەی زیاتری بۆ دروستنەبێت، دەڵێت “زۆر لە قوتابییە هاوپۆلەكانم تووڕەبووم، بەڵام ئەوان وتیان ئەمە لەلای زۆربەی خەڵكە و ئێمەش لە بازاڕ وەرمان گرتووە و لامان وابووە كە لەسەر خواستی خۆت ئەم سەمایەت بڵاوكردۆتەوە”.
    ئەو نكۆڵی لەوە ناكات كە گرتەكە هی ئەوە، بەڵام دەڵێت “لەكاتی گرتنی گرتەی مۆبایلەكە جگە لە چەند ئەندامێكی خێزانەكەم، كەسی بێگانە لە ماڵەكەی ئێمە نەبوو كە گومانی ئەوەی لێبكرێت، ئەم گرتەیەی بڵاوكردبێتەوە. بۆیە دوای گەڕانەوەم بۆ ماڵەوە، شتەكەم بۆ ماڵەوە گێڕایەوە و دوای لێكۆڵینەوە و هەوڵدانێكی زۆر دەركەوت كە یەكێك لە خوشكەكانم مۆبایلەكەی ونكردبوو، هەمان گرتەی مۆبایلی منیش لەسەر میمۆری مۆبایلەكە بووە، كە دواتر كەسانێكی نەفسنزم لە جیاتی پاراستن و گێڕانەوەی بۆ خاوەنەكەی، ئەم گرتە مۆبایلەیان بڵاوكردووەتەوە”، هێما، ئەوەشی گوت كە “تائێستاش بەدوایەوەین كە ئەو كەسە بدۆزینەوە و سكاڵای لەسەر تۆماربكەین”. ئەو كچە خوازیاریش بوو كە كچان ئاگاداری ئەو جۆرە دیاردانە بن و وێنە و گرتە فیدیۆیەكانیان نەخەنە سەر مۆبایل، “نەوەك خوانەخواستە وەكو من تووشی ئەو كێشە و خەم و خەفەتانە ببنەوە و خەڵكی تانە و قسەوقسەلۆكیان لە دوا هەڵبەستن”.
    ئارەزوو رەحیم، ئافرەتێكی خاوەن خێزانی خەڵكی رۆژهەڵاتە، ئەو لەگەڵ هاوسەرەكەی وەك میوانێك لە شاری سۆران لە ماڵی یەكێك لە ناسراوەكانی بوو، ئەویش بەسەرهاتێكی خۆی هەیە و بۆ (سڤیل)، ئاوها دەستی بە گێڕانەوەی چیرۆكی خۆی كرد “لەكاتی ئاوارەبوونی كوردەكان بۆ ئێران، لە شاری بۆكان پەیوەندی دۆستایەتیمان زۆر بەهێزبوو لەگەڵ ئەو ئاوارە كوردانەی كە ماوەی چەند ساڵێك لەوێ نیشتەجێبوون، ئەوەش وایكرد كە دوای گەڕانەوەی ئەو ئاوارانە، بەردەوام ئێمە هاتوچۆی یەكتری بكەین، بەڵام ئەوەی لەدواسەفەرمدا منی نیگەران كرد، بڵاوبوونەوەی گرتەیەكی ڤیدیۆی منە لە هەرێمی كوردستان كە سەمای من نیشاندەدات”. وەكو دواتر ئەو ژنە رۆژهەڵاتییە باسی لێوەكرد “ئەو گرتە ڤیدۆیەش بۆ ئەوكاتە دەگەڕێتەوە كە ساڵێك لەمەوبەر وەك ئێستا سەردانی هەرێمی كوردستانمان كرد، لە ئاهەنگێك وەك نمایشكارێك دەستم بەسەماكردن كرد، بەڵام جگە لەوانەی كە هاوڕێم بوون، كەسی دیكەش هەبوون لەشوێنەكە، بە مۆبایل وێنەی منیان دەگرت”. وەكو ئەو دەڵێت “لەسەرەتاوە زۆر لام ئاسایی بوو، وا هەستمكرد ئەوانە تەنها بۆخۆیان ئەم وێنەیەم دەگرن، بەڵام ئێستا زۆر لە ناسراوەكانم لە سۆران پێم دەڵێن گرتە مۆبایلییەكانت بڵاوبووەتەوە، ئەم هەواڵەش منی زۆر دڵگرانكرد، جگە لەوەش هاوسەرەكەم زۆر قسەی ناشرینی پێوتم، بەڵام ئەگەر مرۆڤ بە ویستی خۆی كارێك ئەنجام بدات، پەشیمانی بایەخی نابێت، ئەگەرنا ئەوەندە شەرمەزارم، رقم لەخۆمە، نازانم پەنا بۆ كوێ بەرم، ئەگەر دەمزانی لەسەرەتاوە كێ ئەمەی بڵاوكردووەتەوە نەك سكاڵا، بەڵكو ئەوەی خراپە بەرامبەرم ئەنجامدەدا و هەرگیز لێی خۆش نەدەبووم”، دەشڵێت “پێویستە مرۆڤ بەرلەوەی هەنگاو بهاوێژێت ئاگاداری بەر پێی خۆی بێت”.
    سیما، ناوی خوازراوی كچێكی (23) ساڵەی دانیشتووی شارۆچكەی سۆرانە، وەك كارمەندێكی گرێبەست لە دەزگایەكی راگەیاندن كاردەكات، باس لەوە دەكات كە بەپێی ئەوەی چەند ساڵێك لە ئاوارەیی بووە، فێری سەماكردن بووە و بەردەوامیش لە ماڵەوە خەریكی ئەو كارەیە. گوتیشی “من زۆربەی شەوان بەتایبەتی لە كاتی بوونی ئاهەنگ و بۆنەكاندا لە ماڵەوەم، لەو ژوورەی كە من و خۆشكەكانم لێی دادەنیشین، لەبەر سیدی یاخود لەبەر تەسجیل سەمادەكەین، زۆربەی جارانیش یەكێك لە ئەندامانی خێزانەكەمان بەكامیرا یاخود مۆبایل گرتەمان دەگرێت، دواتر سەیری دەكەینەوە چونكە بەلامانەوە، زۆر شتێكی ئاساییە كە ئێستا چەندین گرتەی لەو شێوەیەمان هەیە و پارێزراوە، كە نەمانهێشتووە لە دەرەوەی خێزانەكەمان بڵاوببێتەوە و خەڵكی سەیری بكات”، لەبارەی ترسی بڵاوبوونەوەی گرتەكانیش، دەڵێت “كۆمەڵگای ئێمە هێشتا نەگەیشتۆتە ئەو ئاستەی كە قبوڵی بكات و تائێستا ئەو شتە بە عەیب دەزانرێت و لە بەهای كەسەكان كەم دەبێتەوە، ئەگەرنا بەلای منەوە هیچ جیاوازیەكی نییە لەگەڵ ئەوەی كە ئافرەتێك بەسەماوە لەسەر تیڤیەكان گۆرانی بڵێت، یان ئەوانەی لە كلیپێكی گۆرانی، هەڵپەڕكێ دەكەن”، ئەو كچە بڕوای وایە كە سەماكردن و هەڵپەڕكێ یەك رێچكەی هونەرن كە مرۆڤ ئارەزوی لەسەرە.
    ئەفسەری نوسینگەی بەدواداچوونی توندوتیژی دژ بە ئافرەتان لە سۆران، سەبارەت بە پرسی بڵاوبوونەوەی گرتە ڤیدیۆییەكانی ئافرەتان لەناو خەڵكدا، دەڵێت “بڵاوكردنەوەی ئەم جۆرە فیلم و گرتە مۆبایلانە بە تاوانێكی گەورە دادەنرێت، چونكە زۆرجار لەم رێگەیەوە كێشەی كۆمەڵایەتی سەرهەڵدەدات، بەڵام تائێستا لە سنووری ئێمە هیچ ئافرەتێك نەهاتۆتە لامان سكاڵای لەو جۆرە تۆماربكات”، هێمای بۆ ئەوەشكرد و گوتی “بەڵام ئەگەر ئافرەتێك دووچاری ئەم رووداوە ببێتەوە و پەنا بۆ ئێمە بێنێت، بەدواداچوونی جددی لەسەر دەكەین و دەبێت ئەنجامدەرانی كارەكە بەپێی یاسا، لێپێچینەوەی توندیان لەگەڵ بكرێت، بەو مەرجەی ئەگەر وێنەگرتن و بڵاوكردنەوەكەی گرتەكە لەسەر خواستی ئافرەتەكە خۆی، نەبووبێت”.

  • بنێره‌ بۆ فه‌یس بوک

  •    ئه‌م بابه‌ته‌ 26,229 جار خوێنراوه‌ته‌وه‌

    ئاگاداری گرنگ :تکایه‌ سه‌رنجێک مه‌نوسه‌ که‌له‌گه‌ڵ ڕه‌وشتی گه‌له‌که‌مان ناگونجێت ئه‌م سه‌رنجانه‌ پاش پیاچوونه‌وه ‌ بڵاوده‌کرێنه‌وه‌. بۆیه‌ خۆت ماندوو مه‌که‌ له‌نوسینی سه‌رنجی بێمانا. تا ئێمه‌ش ڕێگه‌ی سه‌رنج نوسین دانه‌خه‌ین.

    New Page 1

    لێرە کلیک بکەن بۆ نووسین بە کوردی سۆرانی

    سه‌رنج بنوسه‌

    ئیمه‌یڵه‌که‌ت که‌س نایبینێ

    Protected by WP Anti Spam

    میوانی سەرهێڵ

    0 میوان له‌سه‌ر هێڵه‌
    ................................. سه‌ردانه‌کان ژماره‌ی سه‌ردان

    گه‌ڕان له‌م ماڵپه‌ڕه‌

    کەش و هەوا

    درامای پەتریپوت

    ماڵپەڕی خۆشی

    ناوی منداڵان

    نرخی دراوه‌کان

    گۆرانی عه‌ره‌بی

    Archives

    New Page 1
    New Page 1
    New Page 1
    NRT ناوخۆ پەیامنێر خەندان سبەی هاوڵاتی ئاوێنە
        سڤیل کوردیۆ لڤین PUK-MEDIA SNN