خۆشەویستی تاک لایەنەی پەری کۆتایی بەژیانی دێنێت

خۆشەویستی کچێک بۆ ھاوڕێیەکی براکەی دەبێتەھۆی کۆتایھێنان بەژیانی خۆی و ئەو ھاورێیەی براکەی کەھاوسەر و دوو منداڵیشی ھەیە، لەئێستاشدا باوکی کچەکە و برایەکی لەسەر رووداوەکە لەزینداندان.

کارزان و خالید وەک دوو ھاورێی زۆر نزیک کە لەمنداڵیەوە لەگەڕەکێکدا پێکەوەبوون، پەیوەندییەکەیان لەگەورەبوونیشیاندا بەردەوام دەبێت، سەردانی ماڵی یەکدیش دەکەن،  کارزانی ٣٣ ساڵ کە ھاوسەر و دوو منداڵی ھەیە و شۆفێری ئۆتۆمبێلی بارھەڵگرە لەیەکێک لەکۆمپانیاکاندا رۆژانە دەوام دەکات، زۆرکات دوای دەوامی کارکردنی سەردانی خالید دەکات و پێکەوە دەچنەدەرەوە و جارجاریش دەچنەوە ماڵی یەکتر.

بەردەوامی تێکەڵبوونی ئەم دوو ھاوڕێیە و سەردانیکردنی کارزان بۆ ماڵی خالیدی ھاوڕێی، دەبێتەھۆی سەرنجڕاکێشانی خوشکێکی خالید کە ناوی(پەری)و تەمەنی ١٩ ساڵە، دواتر ھەستی خۆشەویستی بەرامبەر ھاوڕێی براکەی لادروست دەبێت و تاک لایەنە بەردەوام بیری لێدەکاتەوە و ئەو ھەستەی بەرامبەر زیاتر دەبێت، ئەم ھەستەی پەری بەرامبەر کارزان لەکاتێکدایە ئاگاداری ئەوەشە کە کارزان ھاوسەر و دوو منداڵیشی ھەیە، ھەوڵدەدات پەیوەندی پێوەبکات و ژمارەی کارزان کە لەسەر جامی پێشەوەی ئۆتۆمبێلەکەی دایناوە دەست دەکەوێت و بەناوی کچێکی دیکەوە پەیوەندی لەگەڵ دروست دەکات، رۆژانەش قسەی لەگەڵ دەکات، رۆژێک بڕیاردەدات کە خۆی لای کارزان ئاشکرابکات و پێیدەڵێت پەری خوشکی خالیدم ئەو چەند وشەیە کارزان تووشی شۆک دەکات و بەپەلە تەلەفونەکەی بەسەردا دادەخاتەوە.

کارزان لەترسی ئاشکرابوونی ئەم پەیوەندییە و زویربوونی خالیدی ھاوڕێی کەزۆریەکتریان خۆش دەوێت تەلەفون بۆ پەری دەکاتەوە و داوای لێدەکات چیتر پەیوەندی پێوەنەکات، بەڵام پەری ھەر سورە لەسەر داواکەی خۆی و بەکارزان رادەگەیەنێت ئەگەر رازی نەبێت بەپەیوەیدنی نێوانیان ھەموو کارێک دەکات بۆ گەیشتنی بە کارزان، دەڵێت رادەکەم و پێکەوە ھەڵدێین، ئەم قسانەش ھێندەی تر کارزان تووشی شڵەژان دەکات.

رۆژی دواتر پەری پەیوەندی بەکارزانەوە دەکات و پێیڕادەگەیەنێت کە لەماڵ چۆتەدەرەوە، دەڵێت بڕیارەکەی خۆمم جێبەجێ کردووە و لەماڵ ھاتومەتە دەرەوە، کارزان بەپەلە دەچێتە لای خاوەنی کارەکەی و داوای مۆڵەتی لێدەکات و کارزان بەئۆتۆمبێلێکی ژمارە تایبەتی ھاوڕێیەکی لەکۆمپانیا دەچێت بۆلای پەری، زۆر داوای لێدەکات بڕواتەوە بۆ ماڵەوە، بەڵام پەری لەبڕیارەکەی پاشگەزنابێتەوە و دەڵێت لەگەڵ تۆدا دەبم، دوای ماوەک قسەکردن کارزان دەستی پەری دەگرێت و  بەزۆر دەیخاتە ناو ئۆتۆمبێلەکەیەوە، لەو کاتەدا خالید ئەم دیمەنە دەبینێت و دەستبەجێ پۆلیسی لێ ئاگاداردەکاتەوە و سکاڵا لەسەر کارزان تۆماردەکەن.

دوای ئەوەی کارزان دەستگیر دەکرێت، یاسا بەماددەی ٤٢١ لە یاسای سزادانی عیراقی دەستگیری دەکات و بەھۆی نەبوونی بەڵگەوە ناوبراو ئازاد دەکرێت ، بەڵام ھێشتا کەسوکاری کچەکە بەبڕیاری دادگا رازی نابن و لەشەوێکی تاریکدا کچەکەیان دەکوژن، لەژێر بیانووی پاکردنەوەی شەرەفیاندا.

لەئێستادا خالید و باوکی پەری بەتاوانی کوشتن لەشەودا، زیندانیکراون ، لێرەدا دەمانەوێت لەرێگەی خستنەڕووی ئەم بەسەرھاتە ئەو پەیامە بگەیەنین کە بەزووی بڕیارنەدەین و بەھەڵە لێکدانەوە بۆ ئەو دیمەنانە نەکەین کە بەچاو دەیبینین.

تێبینی:

１- ئەم بەسەرھاتە لە یەکێک لە شارەکانی ھەرێم روویداوە و راستەقینەیە.

２- سەرجەم ناوەکان لای SNN پارێزراوە، ناوە بەکارھێنراوەکانی ناو بەسەرھاتەکە گوزارشت لەناوی راستەقینەی کەسەکان ناکەن.