• مۆڵەتنامەی شۆفێری جیهانی داوا بکە
  • ریکلام سەرتەک٣
  • SARTAK TRAVEL
  • ریکلامی ٥٧٠
  • harem reklam
  • سورین تراڤل
  • شاپۆست تەواو دەبێت لە ١٢-١٢-٢٠١٦
  • ئەرین بۆ کرێدانی ئۆتۆمبێل ١١/٨/٢٠١٧
  • ریکلام ئای ستار
  • سەرتەک تراڤڵ
  • بۆ فرۆشتن
  • بۆ فرۆشتن
  • ریکلام١٨٠ تازە
  • ریکلام١٨٠-٩٩
  • رەیکلام ١٨٠-١١٢
  • reklami amozhgari 2-6-2017

"دەستدرێژی سێكسیان دەكردە سەر كچە منداڵەكان و بە تەمەنەكانیشیان برسی دەكرد"

\
لەناو كەمپی ئاوارەكانی كوردی ئێزدی سەدان كچی رزگاربووی ژێر دەستی داعش هەن كە لە ٣ی ئابی ساڵی ٢٠١٤دا لەلایەن چەكدارانی داعشەوە رفێندرابوون بۆ ناوچەكانی ژێر دەسەڵاتی خۆیان لە عێراق و سووریا. تا ئێستا بە هەزاران كچ و ژنی كوردی ئێزدی رفێنراو بەڕێگەی جیاجیا رزگار كراون، بەڵام ژمارەیەكی زیاتریش لە ژێر شمشێرە تیژ و ئاڵا رەشەكانی داعش ژیان بەسەر دەبەن.
عەنیفە ساڵح كچێكی تەمەن ٢٥ ساڵە و دانیشتووی شارۆچكەی شنگالە و یەكێكە لە رزگاربووانی ژێر دەستی داعش لە كەمپێكی شێخان لەناو خیوەتێك لەگەڵ خانەوادەكەی دەژیت. ئەو كچە رزگاربووە ژیانی دووساڵی ژێر دەستی داعش بۆ ئاژانسی ئانادۆڵو دەگێڕتەوە و دەڵێت: "داعش كە لە مانگی هەشتی ساڵی ٢٠١٤دا گەیشتە شنگال چەكدارە ریشپانەكانی بەناو كوچە و كۆڵانی شاردا بڵاو بوونەوە و هەڵیانكوتایە سەر ماڵ بە ماڵی شارۆچكەكە و بە كوشتنی سەدان كەس لە ماڵ و كۆڵانەكانی شنگال دانیشتووانی شارۆچكەكەیان تۆقاند. لەو ساتەوە كابوسێكی ترسناك دایگرتین، گریان و هاواری كچ، ژن، پیاو، منداڵ و پەككەوتە پێكەوە بۆ ئاسمان بەرز دەبوویەوە، تا چەند دەنگی هاوارەكانمان زیاتر هەڵبڕیبایە زەبر و زەنگی داعش بە هێزتر دەبوو لەسەرمان. بۆ ترساندنمان هەڵسان بە كوشتنی چەند منداڵ و كچێك بە بەرچاوی هەمووانەوە، داعش بەو كردەوەیەی توانی هاوار و دەنگی كوردی ئێزدی كپ بكاتەوە، بۆ ماوەی ١٢ سەعات لەناو خوێن كوژراوان ژیایین".
ئەو كچە رزگاربووەی ژێر دەستی داعش گوتی: "دوای مانەوەمان بۆ چەند كاتژمێرێك لەژێر بۆردومان و تەق و تۆقێكی زۆری هێزەكان لە شنگال، داعش ئێمەی لە چەند شوێنێك كۆكردەوە و قۆناغی گواستنەوەی كەسە بەدیلگیراوەكانی شنگالی دەست پێ كرد و زۆرینەی بەدیلگیراوەكان كچ، ژن و منداڵ بوون. لە كاتژمێر هەشتی ئێوارە تاریكییەكی سامناك ناوچەكەی داگرت، لەم تاریكییەدا دەیان ئۆتۆمبێلی بارهەڵگری تیرۆریستانی داعش لە دەورووبەرمان وەستان، بە هەڕەشەی لوولەی تفەنگەكانیان ئێمەیان پەڵكێشی ناو ئۆتۆمبێلەكان كرد، بەرەو تەلەعفەر ئێمەیان گواستەوە لە قوتابخانەیەكی تەلەعفەر ئێمەیان كۆكردەوە و ئەمیرێكی شمشێر بە دەستی ریشداری داعش كە چەند پاسەوانێك دەوریاندا بوو بە بڵندگۆ داوای لێكردین دەستبەرداری ئایینی ئێزدی بین، دەنگی بەرزكردەوە بە هەڕەشەوە گوتی 'هەر كەسێك ئەو داوایەی (دەوڵەتی ئیسلامی لە عێراق و شام) رەتبكاتەوە بە شمشێرەكەم سەری دەپەڕێنم'. بێ دەنگیمان باشترین وەڵام بوو لەو ساتەدا".
ئەو گوتیشی: "هەر لە تەلەعفەر داعش هەڵستا بەلێكجیاكردنەوەی ئافرەتانی كوردی ئێزدی، كچانی گەنج و شۆخ و شەنگیان هەڵبژارد و گوتیان ئەمانە خەڵاتن بۆ ئەمیرەكانمان دەیان بەین، بۆ ئەوەی هاوسەرگیریان لەگەڵدا بكەن، دواتر كچانی ٧ ساڵ تا ١٤ ساڵییان گواستەوە بۆ قوتابخانەیەكی دیكەی تەلەعفەر. دەیان جار تیرۆریستانی داعش بە بەرچاوی ئێمەوە دەستدرێژی سێكسیان كردووەتەوە سەر منداڵە هەشت ساڵەكان تەنانەت جاری وا هەبوو دەستدرێژی بە كۆمەڵیان لەگەڵ ئەو كچە هەشت ساڵانە ئەنجامداوە، كاتێك تەندروستی ئەو كچانە تێچووبایە پزیشكیان دەهێنا بۆ ئەوەی چارەسەری پزیشكی وەربگرن".
 
عەنیفە ساڵح هەروەها گوتی: "قوتابخانەیەكی دیكە لە تەلەعفەر تایبەت بەو كچ و ژنانەی تەمەنیان لە ١٦ ساڵی تا ٤٠ ساڵی بوو. لەو قوتابخانەیە ئەشكەنجەدان و برسیكردن پیشەی هەمیشەیی تیرۆریستانی داعش بوو. داعش ئافرەتانی ئەم قوتابخانەیەی بەسەر چەكداری خۆی لە بنكە سەربازییەكانی هێڵی شەڕ دابەشكردبوو بۆ ئەوەی ئارەزووی سێكسیان لەگەڵ بەتاڵ بكەن، جاری وا هەبوو لە یەك شەودا یەك ئافرەتیان بۆ حەوت بنكە دەگواستەوە و دەستدرێژی بە كۆمەڵییان لەگەڵ ئەنجامدەدا".
عەنیفە ساڵح باس لە برسیكردن و ئەشكەنجەدان دەكات و دەڵێت: "جارێك دەنگی فڕۆكەی جەنگی لە ئاسمانی تەلەعفەر بیسترا و چووینە سەر بینای ئەو قوتابخانەیەی كە وەك زیندانی لێكرا بوو و لەسەر بینای قوتابخانە دەستمان بەرز كرد بۆ ئەوەی بگاتە فریامان، لەو كاتەوە چەكدارێك بە قۆنداغی كلاشینكۆف لە بڕبڕەی پشتی دام و یەكسەر پەڵكەوتم، بە چاوی خۆم بینیم دەیان چەكدار بە قۆنداغی كلاشینكۆف، چەقۆ، ئاسن و دار كەوتنە گیانی ئافرەتەكان بەشێوەیەكی زۆر دڕندانە ئەشكەنجە دراین. دواتر داوایان لێ كردین لە گۆڕەپانی قوتابخانەكە كۆببینەوە و گوتیان هەر كاتێك دەنگی فڕۆكە بێت ئەم حاڵەتەی ئێستا دووبار بكەنەوە سەرجەمتان گولـلە باران دەكەین، دوای ئەمە قۆناغی برسیكردن دەستیپێكرد، خواردن و خواردنەوەی پێویست بۆمان دابین نەدەكرا ماوەی ساڵێك و سێ مانگ لەژێر ئەشكەنجەی جیاجیای داعش ژیایین، جاری وا هەبوو لە شەو و رۆژێكدا تەنها پەتاتەیەكی كوڵامان پێدەدرا. لە برسیكردن ئافرەتە بە تەمەنەكان پشكی شێریان بەركەوتووبوو".
ئەو كچە ئێزدییە رزگاربووەی ژێر دەستی داعش درێژە بە گێڕانەوەی چێرۆكەكەی دەدات و دەڵێت: "بەیانی زوو دوو ئۆتۆمبێلی بارهەڵگر هاتن بۆناو قوتابخانەی تەلەعفەر ژمارەیەكی زۆر لە ئافرەتەكانیان وەك ئاژەڵ لێ باركرد كە من یەكێك بووم لەو ئافرەتانە و بەرەو شارۆچكەی بادۆشی نزیك شاری مووسڵ ئێمەیان گواستەوە كە گەیشتین بەو شوێنە بینیمان ژمارەیەكی زۆر لە كچ و ژنی ئێزدی لەو شارۆچكەیەن. هەندێكمان یەكترمان دەناسی و لە بن گوێی یەكتر بە هیواشی باسی نەهامەتییەكانمان دەكرد، بۆیان گێڕامەوە كە لە چەند رۆژی رابردوودا وەك كاردانەوەیەك دژی كردەوە قێزەوەنەكانی داعش سێ كچ خۆیان كوشتووە، ئێمە بەترس و لەرزێكی زۆرەوە لەو باسەدا بووین قیژە و گریانی كچێكی دیكە هۆڵ و ژوورەكانی بیناكەی داگرت، دوو چەكداری داعش چوون بۆ گەرماوی بیناكە لاشەی كچێكیان بەناوی (جیلان) دەرهێنا و، بینیمان ئەویش لە گەرماوی بیناكەدا لە داخی داعش خۆی كوشتووە، حەوت مانگ لە ژێر زوڵم و ستەمی تیرۆریستانی داعش ژیایین لە شارۆچكەی بادۆش".
عەنیفە ساڵح گوتیشی: "لە ماوەی ئەو حەوت مانگەی ژێر دەستی داعش لە بادۆش تراجیدیایەكی نەبیستراو و نەبینراومان بینی، ئافرەتان و منداڵان قوربانی یەكەم بوون، هەر لە بادۆش تیرۆریستانی داعش منداڵانی كوردی ئێزدیان چەكدار دەكرد و راهێنانی سەربازیان پێ دەكردن. لەگەڵ مەشقپێكردن بابەتی ئایینی و ئایدۆلۆجییان فێر دەكردن. لە كاتی راهێنان و وانە گوتنەوەدا هەر منداڵێك هەڵەی بكردایە بە بەرچاوی هەموو منداڵەكانی دیكە پەنجە یان دەستێكیان دەبڕی، ئەوەش بۆ چاندنی ترس بوو لەناو دڵی منداڵانی دیكە تاوەكو لە رێنماییەكانی داعش دەرنەچن و لەو ماوەیەدا منداڵەكانیان كردن بە چەكداری لێهاتوو و فێری سروود فەرموودە و بابەتی ئایینیش كران".
ناوبراو هەروەها گوتی: "داعش لە گواستنەوە و جێگۆڕكێكردن بە كچ و ژنانی ئێزدی بەردەوام بوو، ئەمجارە ٢٠ ئافرەتیان گواستەوە بۆ گوندی كەسەرئەلمحراب لەو گوندە ژمارەی چەكدارانی داعش بەشێوەی ناوچەكانی دیكە زۆر نەبوون ماوەی دوو مانگ لەو گوندە ماینەوە ئەو تاوانانەی لە شارۆچكەكانی تەلەعفەر و بادۆش لەگەڵمان كرا بەهەمان شێوە چەكدارانی داعش لەم گوندەش دووبارەیان كردەوە، تاوانێك و بێ رەوشتییەك نەما داعش بەرامبەرمان نەیكەن".
 
- "پێشمەرگە رزگاری كردین"
 
ئەو كچە كوردە ئێزدییە رزگاربووەی ژێر دەستی داعش باسی لە ساتەوەختی رزگاركردنی لەلایەن پێشمەرگە كرد و گوتی: "نەهامەتی و بێ ئۆقرەییمان لە لووتكەدا بوو، هیچ ئومێدێكمان بە ژیان نەمابوو هەرچی بیرۆكەی خراپە بیرمان لێ دەكردەوە، لەناكاو دوو تیرۆریستی داعش بە من و سێ كەسی دیكەیان گوت "ئێوە بەم شەقامەدا بڕۆن" ئێمە رێگەمان گرتەبەر سات بە سات ترسی ئەوەمان هەبوو لە دواوە تەقەمان لێ بكرێت و بكوژرێین، چەند كیلۆمەترێكمان بە پیادە بڕی دواتر ئۆتۆمبێلێكی سەربازی بەرەو روومان هات، ترس دایگرتین كە گەیشتە لامان، گوتیان 'ئێمە پێشمەرگەین سەركەون لە ئۆتۆمبێلەكەمان ئێوەمان رزگار كردووە' دوای سەركەوتنمان لەناو ئۆتۆمبێلەكە فرمێسكی شادی بە چاومان دەهاتە خوار".
ئەو كچە رزگاربووەی ژێر دەستی داعش گوتیشی: "لە رێگای گەڕانەوەماندا بۆ ناوچەكانی ژێر دەسەڵاتی پێشمەرگە، پێشمەرگەكان باسیان لە چۆنیەتی رزگاركردنی ئێمە كرد كە بەدوو هەزار و ٥٠٠ دۆڵار ئەو چوار كەسە رزگاركراون، پێشمەرگە نەبووایە خۆكوشتنمان چارەسەری كۆتاییمان بوو لەژێر دەستی داعش".
باس لە باری دەروونی ئێستای دەكات و دەڵێت: "لە ئێستادا چی لەگەڵمدا كراوە چ شتێكم بەچاوی خۆم بینیوە دێنەوە پێش چاوم، شەوانە لەكاتی خەوتن هەموو تاوانەكانی داعش دێتەوە پێش چاوم و خەوم لێ حەرام دەبێت، بە حەب و دەرمان نەبێت خەوم نییە. زۆرجار لە شەوان كە خەوم لێ دەكەوێت لە ناكاو رادەچڵەكێم و تووشی خەوزڕان دەبم، ئەوەی داعش كردوویەتی بەرامبەر بە كوردی ئێزدی لە مێژووی هیچ نەتەوەیەك رووینەداوە".
عەنیفە ساڵح داواكاری سەرەكی ئەوەیە ئەو كچ و ژنانەی لە دەست داعش ماون رزگار بكرێن وەك خۆی دەڵێت: "ئەوەی ژیانی ژێر دەستی داعشی نەدی بێت لەو داوایەی من تێناگات، تكام لە هەموو لایەنە پەیوەندیدارەكانی هەرێمی كوردستان، عێراق و وڵاتانی جیهان ئەوەیە كاری بەپەلە بكەن بۆ رزگاركردنی كچ و ژنانی كوردی ئیزدی لە دەست داعش، چونكە ئەو ئافرەتانە بەردەوام كڕین و فرۆشتنیان پێ دەكرێت لەلایەن تیرۆریستانی داعشەوە دەستدرێژی سێكسیان دەكرێتە سەر".
|1829 جار خوێندراوەتەوە|